طلق مراتك تحبها اكتر

تخيل كدا مراتك تصحى كل يوم على غيار الريق تديلك قلمين وبوكسين وشلوطين ،وده يبقي بمثابة الفطار اليومى المعتبر لحضرتك ، ها ؟ تخيلت ؟ ..طيب أستاذن أنا .

تخيل كدا بعدها آجى أسألك عن إنسانيتك ، فتدورعليها فى جيبك وماتلاقيهاش أو تلاقيها حمضت ، ها ؟ تخيلت ؟ .. ياخسارة دى كانت حاجة مفيدة قوى بس للى كان بيستخدمها  يالا خيرها في غيرها ، أستأذنك أنا بقي علشان مستعجلة.

تخيل كدا إنها تعملك محضر علشان تمشيك عالعجين وأنت برضه تلخبطه ،ها ؟ تخيلت ؟ ،تستاهل على فكرة ،ماهو اللى بيقدم السبت بيلاقي باقي الأسبوع ولامؤاخذة.

طيب تخيل إنك تحرشت بيها ،فتقوم هى تتحرش بيك فى ساعتها على طول ،ماهو البادى أظلم ،ها يابنى تخيلت ولا إيه ؟  ،طيب أقوم أجرى بسرعة أنا.

تخيل كدا تبقي ماشي تلف فى الشوارع علشان حد يشتريلك صاحب أصيل وتطلب منهم وتقول لهم ممكن تشترولى صاحب ؟ وهما يردوا عليك بماكانش يتعز، ها ؟ تخيلت ؟ ..طبعا كلنا تخيلنا مش هو لوحده.

تخيل لما تقول لعيالك أبوكم مات وشبع موت ،فالناس تقولك لم مراتك أحسنلك ،تخيل الموضوع ده لوحدك  وأجيلك بعدين دى أمور عائلية مش عاوزة أدخل فيها.

تخيل كدا أقولك إلحق المعلش قبل مايخلص وماتتبطرش ، واحمد ربنا إن فيه حد بيمعلشك لحد دلوقتى ،تقولى لأ دى مستفزة جدا ،خلاص ياعم براحتك ماتزوقش.