Qayym عن العيشة واللي عايشينها

مضغوط؟ طهقان؟ مشاكل كتيـر؟ زهقانة؟

الحياة سخيفة والناس مش سالكة؟! متضايق من العيشة واللي عايشينها؟!

كلنا بيحصلنا مواقف وقصص كل يوم، أغلبها بيفوت ويعدي كإنه محصلش، بس كتير بنقف عنده ونتعلم منه سواء إحنا اللي مرينا بيه أو غيرنا عاشه وحكاه، وساعات بيتراكم لحد ما يضغط علينا وننفجر. "العيـشة واللي عايشيـنها" هيبدأ معاكم كل فصل بقصة صغيرة والقصة مرتبطة بوجع من أوجاع العيشة اللي هنتكلم عنه، الوجع بقا ده حكايته حكاية! له صور وأشكال كتير، هنشوف بيحصلنا ازاي، وإيه مشاعره وتصرفاته وبالتالي تبعياته.

بعد كده هنشوف أهل العلم والمؤلفين والباحثين قالولنا إيه وعلمونا إيه في كل وجع.. أصل كل وجع له مجال دراسة سواء بشكل علمي أو خبرات حياتية.. والجزء ده هنا اسمه "حتة العلم" واللي يزود ثقتنا في الكلام ده وتأثير تطبيقه الأبحاث المنشورة في كل مجال.

طيب وحل الوجع إيه؟؟ تشحن نفسك بنفسك!

 هنعمل مع كل وجع تلات علاجات/ تمارين عشان نقول لك تشحن ازاي وتتعامل معاه ازاي. التلات علاجات دول أولهم حل فوري وبسيط، مش محتاج مجهود ولا وقت تعمله فورًا بعد ما تقرأ كل فصل هتدوق كده بداية الحل.

التاني هتعمله على مدار أسبوع، محتاج شوية عزم وتظبطه لنفسك وتعمله مرة أو مرتين في الأسبوع وهيجيب نتيجة أوضح. التالت حل طويل الأمد شوية، هيعوز شوية وقت ومجهود بس نتيجته تستاهل، يعني استثمار لنفسك وفي نفسك لإنه هيتعمل على مدار فترة طويلة؛ هيكون مرتبط بقيمة أو مهارة محتاجة منك شوية شغل وتركيز وقصادهم غالبًا هتبقا يا اتعالجت يا حليت جزء كبير من الوجع.

آخر العنقود في كل فصل.. "الزتونة"، الخلاصة في كلمتين يفكرونا بكل فصل بشكل مختصر ولذيذ. بس خلي بالك، القرار قرارك.. القراية لوحدها مش كفاية، الوجع مش هيروح لوحده، لازم تشتغل عشان تتعامل مع وجع العيشة.

هنشوف ٢٤ لقطة، لـ ٢٤ وجع، ومعانا ٢٤ زتونة.. يلا؟!