Qayym من أين بدأ الاسكربت رايتنج؟

2019 كانت محطة انطلاقي لاكتشاف العالم بعد ما اتخرجت من الكلية، وقتها حاولت أدخل في مجال الـ Script Writing بس كانت محاولات على خفيف، والوضع كان صعب جدًّا زي ما حكيتلك، ومش عارفة ألاقي حد عنده خبرة كافية يديني feedback على شغلي، مجرد محاولات ومذاكرة لأكتر من مصدر وبس، واختراع أساليب لا تنتهي للتطبيق!

وقررت وقتها إني محتاجة أتطوع في أماكن عشان أخد فيها فرصة للتطبيق، لحد ما الصدفة البحتة وقعت قدامي فرصة كتابة بودكاست لأول مرة بعد ما اطوعت في مكان معروف، وبدأت كتابة أول حلقة في البودكاست وأنا عاملة حسابي إن دي هتكون أول وآخر حلقة لأني بدأت وأنا مش عارفة هقدر أكمل ولا لا، لكن المفاجأة إن الحلقة نجحت جدًّا، والشخص اللي كان شايف إن كار الاسكربت مش كاره، قدر يكتب 7 حلقات من أصل 10 في الموسم الأول من البودكاست ده، ويكون مشرف على جزء كبير من الموسم التاني منه.

 ويعمل بودكاست تاني مع جروب عبَّر بالمحتوى وهو بودكاست "الورشة"، ويشرف عليه بالكامل ويشارك في كتابته وتقديمه مع فريق كبير، ومن هنا بدأت أعرف إن ده أكتر مجال حبيته ولقيت نفسي فيه، وبدأت أتعمق فيه أكتر وأتخصص في حاجات أكتر جوا من إعلانات لأنيميشن لكتابة برامج في منصات عليها ملايين المتابعين.